काठमाडौं । अख्तियार दुरुपयोग अनुसन्धान आयोगले रौतहटको इशनाथ नगरपालिकाका तत्कालीन निमित्त प्रमुख प्रशासकीय अधिकृत नन्दकिशोर गुप्ताविरुद्ध विशेष अदालतमा भ्रष्टाचार मुद्दा दायर गरेको छ ।
अख्तियारका अनुसार, गुप्ताले अनियमित तरिकाले रु १,४९,९७,८६४.२० हिनामिना गरेको ठहर गर्दै उनीविरुद्ध भ्रष्टाचार निवारण ऐन, २०१७ को दफा १५ र प्रचलित भ्रष्टाचार निवारण ऐन, २०५९ को दफा २० को उपदफा (१) अनुसार कारबाहीको मागसहित मुद्दा दायर गरिएको हो ।
अख्तियारले गुप्तासँगै उनकी श्रीमती उषा गुप्तालाई समेत स्रोत नखुलेको सम्पत्तिको आरोपमा प्रतिवादी कायम गरेको छ । अख्तियारले गैरकानुनी रूपमा आर्जन गरेको सम्पत्ति जफत गरी कानुनी कारबाही गर्न विशेष अदालतसमक्ष माग गरेको छ ।
विशेष अदालतमा दायर मुद्दामा अख्तियारले गुप्ताविरुद्ध कैद तथा जरिवानाको सजायको माग गर्दै, अनियमित रूपमा आर्जन गरिएको सम्पत्ति कानुनी दायराभित्र ल्याउन आवश्यक कारबाही अगाडि बढाउन आग्रह गरेको छ ।
