काठमाडौं । अख्तियार दुरुपयोग अनुसन्धान आयोगले मालपोत कार्यालय धनकुटासँग सम्बन्धित १५ जनाविरुद्ध भ्रष्टाचार मुद्दा दायर गरेको छ । आयोगले तत्कालीन कार्यालय प्रमुख, शाखा अधिकृत, सर्भेक्षक, नायब सुब्बासहितका कर्मचारी तथा सम्बन्धित जग्गाधनीहरूलाई प्रतिवादी बनाउँदै गैरकानुनी लाभ लिएको तथा घुस–रिसवतमार्फत भ्रष्टाचार गरेको आरोपमा विशेष अदालतमा मुद्दा दायर गरेको हो ।
मुद्दामा मालपोत कार्यालय धनकुटाका तत्कालीन कार्यालय प्रमुख सुरेश थपलिया, शाखा अधिकृत टंकप्रसाद दुवाडी, सर्भेक्षक राजेन्द्रप्रसाद यादव, ताँखुवा गाउँ विकास समितिका तत्कालीन सचिव भक्तबहादुर भट्टराई, नासु माधवबहादुर भट्टराईसहित अन्य व्यक्तिहरूलाई प्रतिवादी बनाइएको छ ।
त्यसैगरी, जग्गाधनीहरू खगेन्द्रबहादुर थापा, हिमा बस्नेत, ज्ञानकुमारी मगर, मित्रबहादुर मगर, अम्बरबहादुर मगर, पद्यमबहादुर सिजाली, निर्मला घिमिरे तथा छुट जग्गा दर्ता गर्ने माधवबहादुर भट्टराईलाई पनि मुद्दामा समावेश गरिएको आयोगले जनाएको छ ।
आयोगका अनुसार उनीहरूले दर्ता पुस्तिका (ढड्डा) मा किर्ते गरी सरकारी जग्गा व्यक्तिको नाममा दर्ता गराएको आरोप लागेको छ । उक्त कार्यमार्फत सरकारी सम्पत्तिमा गैरकानुनी हानि पुर्याइएको दाबी आयोगले गरेको छ ।
