काठमाडौं । शनिबार दशरथ रंगशाला ५० औं दीक्षान्त समारोहको उत्साहले भरियो । करिब १४ हजार विद्यार्थीहरूको भिडमा दुई विशेष नामले सबैको ध्यान खिच्यो, रेविका भण्डारी र रिकिता भण्डारी । काठमाडौं महानगरपालिका २७ निवासी २८ वर्षीया रेविका र उनकी २७ वर्षीया बहिनी रिकिता दुवै ‘गोल्ड मेडलिस्ट’ बनेका हुन् ।
रेविकाको यात्रा : व्यवस्थापनमा उत्कृष्टता
रेविका भण्डारीले त्रिभुवन विश्वविद्यालयको व्यवस्थापन संकाय अन्तर्गत एमबिएस (स्नातकोत्तर) मा ३.९० सिजिपिए ल्याएर उत्कृष्टता हासिल गरिन् । उनलाई ‘नेपाल बैंक लिमिटेड सरदार गुञ्जमान सिंह स्वर्ण पदक’ र ‘रामकृष्ण न्हुच्छे प्रधान पुरस्कार’ प्रदान गरिएको हो ।
प्रधानमन्त्री तथा त्रिवि कुलपति केपी शर्मा ओलीले रेविकालाई उक्त पदक र सम्मान प्रदान गरेका हुन् । काम र अध्ययनसँगै व्यवस्थापन गर्नु परेपनि रेविका कुनैपनि चुनौतीले पछि हटिनन् ।
राष्ट्रिय वाणिज्य बैंकमा जागिर गर्दै गर्दा उनले अनलाइन कक्षाबाट एमबिएस पूरा गरिन् । बिहान बेलुकाको समयलाई सदुपयोग गर्दै साथीहरूसँग नोट साटासाट गरेर पढेकी उनले आफ्नो लक्ष्य हासिल गरिन् ।
रिकिताको सफलता : वातावरण विज्ञानमा नयाँ कीर्तिमान
उनकी बहिनी रिकिता भण्डारीले वातावरण विज्ञानमा एमएस्सी गर्दै ३.९४ सिजिपिए हासिल गरिन् । उनले ‘मदन विद्या वातावरण विज्ञान पुरस्कार’ पाइन् । कीर्तिपुरस्थित केन्द्रीय वातावरण विज्ञान विभागबाट अध्ययन गरेकी रिकिता अहिले अमेरिका गएकी छन् । उनी वातावरण विज्ञानमा पिएचडी गर्न पाँच वर्षका लागि अमेरिका गएकी हुन् । दीक्षान्त समारोहमा उपस्थित हुन नसकेपनि उनका परिवार र दिदीले रिकिताको सफलतालाई गर्वका साथ मनाए ।
पारिवारिक गर्व र सपना
दिदीबहिनीको उत्कृष्टताले परिवारलाई गौरवान्वित बनाएको छ । आमा बुवा राजेन्द्रकुमार भण्डारी र विमला पाण्डे भण्डारी छोरीहरूको सफलतामा निकै खुसी छन् ।
नेपालमै योगदानको चाहना
रेविकाको भविष्यमा पिएचडी गर्ने सोच छ, तर उनको मुख्य उद्देश्य नेपालमै काम गर्नु हो । दिदी बहिनीको यो प्रेरणादायी यात्रा निश्चय नै नेपाली युवाहरूका लागि प्रेरणा बन्न सक्छ । मेहनत र समर्पणका साथ आफ्नो लक्ष्यमा केन्द्रित हुने हो भने सफलता अवश्य हात लाग्छ ।
