काठमाडौं । आन्तरिक राजस्व कार्यालय धरानका तत्कालीन कर अधिकृत तिलक आलेविरुद्ध भ्रष्टाचारको आरोपमा अख्तियार दुरुपयोग अनुसन्धान आयोगले मुद्दा दायर गरेको छ । आयोगले स्वामीनारायण निर्माण सेवा धरान र सो कम्पनीका सञ्चालक सन्तोषकुमार बस्नेतविरुद्ध पनि बिहीबार विशेष अदालतमा मुद्दा दायर गरेको हो ।
अख्तियारका प्रवक्ता राजेन्द्रकुमार पौडेलका अनुसार, उनीहरूविरुद्ध एक करोड २३ लाख ६९ हजार ६४९ रुपैयाँ बराबरको बिगो र सोही अनुपातको सजाय माग गरिएको छ । आयोगले दायर गरेको अभियोगपत्रका अनुसार आर्थिक वर्ष २०७६/७७ मा सुन्दरहरैचा नगरपालिका र स्वामीनारायण निर्माण सेवाबीच मोरङको गछिया खोलामा उत्खनन कार्यका लागि नौ करोड ५१ लाख ५१ हजार १५१ रुपैयाँमा सम्झौता भएको थियो ।
सम्झौताअनुसार कम्पनीले एक करोड २३ लाख ६९ हजार ६४९ रुपैयाँ कर तिर्नुपर्नेमा कर नतिरी तत्कालीन कर अधिकृत आलेसँग मिलेमतो गरी राजस्व छली गरेको ठहर अख्तियारले गरेको छ । अख्तियारले आले र बस्नेतले आपसी मिलेमतोमा नेपाल सरकारको राजस्व हिनामिना गरी भ्रष्टाचार दुरुपयोग गरेको भन्दै विशेष अदालतमा मुद्दा दायर गरेको हो । आयोगका अनुसार, अनुसन्धानका क्रममा दुवै जनाले कर छली गरी व्यक्तिगत स्वार्थका लागि राज्यको आर्थिक हितविपरीत कार्य गरेको प्रमाण भेटिएको छ ।
