महोत्तरी । मधेस प्रदेश सरकारले महिलाको उच्च शिक्षामा पहुँच बढाउनका लागि छात्रवृत्तिको विशेष व्यवस्था गरेको छ । प्रदेशका अतिविपन्न र सीमान्तकृत समुदायका छोरीलाई उच्च शिक्षा हासिल गर्न प्रोत्साहन दिन यो पहल गरिएको हो ।
प्रदेशका दलित, मुस्लिम, विपन्न र जेहेन्दार छात्रालाई छात्रवृत्ति प्रदान गरिने मधेस प्रदेश शिक्षा निर्देशनालयले जनाएको छ । मुख्यमन्त्री सतिशकुमार सिंहले सीमान्तकृत र विपन्न परिवारका प्रतिभाशाली छात्राले शिक्षा नपाएर अवसर गुमाउन नपरोस् भन्ने उद्देश्यले छात्रवृत्तिको योजना सुरु गरिएको बताए ।
छात्रवृत्ति कार्यक्रम प्रदेशका आठवटै जिल्लामा सञ्चालन हुनेछ । यसका लागि १,०७१ आवेदन प्राप्त भइसकेका छन् । छात्रवृत्ति अन्तर्गत साधारण तथा प्राविधिक शिक्षा पढ्न चाहने छात्रालाई शैक्षिक शुल्कको रूपमा वार्षिक रु २५,००० र ३५,००० उपलब्ध गराइनेछ । प्राविधिक शिक्षाका लागि रु ३५,००० र मानविकी, वाणिज्य तथा शिक्षाका लागि रु २५,००० उपलब्ध गराइनेछ ।
यस कार्यक्रमका लागि प्रदेश सरकारले चालु आर्थिक वर्षमा रु १ करोड ५० लाख विनियोजन गरेको छ । मधेसमा शिक्षाको अवस्था अन्य प्रदेशको तुलनामा कमजोर छ । राष्ट्रिय जनगणना २०७८ अनुसार, मधेसको साक्षरता दर ६३.५ प्रतिशत छ भने महिलाको साक्षरता दर ४३.२ प्रतिशत मात्र रहेको छ ।
महिला साक्षरता दर सुधार गर्न यो छात्रवृत्ति कार्यक्रमले महत्वपूर्ण योगदान पुर्याउने अपेक्षा गरिएको छ । शिक्षा निर्देशनालयले प्रक्रियागत कामहरू पूरा गरेर योग्य छात्रालाई समयमै छात्रवृत्ति उपलब्ध गराउने प्रतिबद्धता व्यक्त गरेको छ ।
