काठमाडौं । नुवाकोटको किस्पाङ गाउँपालिकाका प्रमुख प्रशासकीय अधिकृत धुर्वप्रसाद सापकोटाविरुद्ध अख्तियार दुरुपयोग अनुसन्धान आयोगले भ्रष्टाचार मुद्दा दायर गरेको छ । सापकोटाले अछामको मेल्लेख गाउँपालिकाका प्रमुख प्रशासकीय अधिकृत रहँदा भ्रष्टाचार गरेको आरोपमा मुद्दा दायर गरिएको हो ।
गत मंसिर २८ गते सापकोटा कञ्चनपुरस्थित अख्तियारको कार्यालयमा एक लाख रुपैयाँ घुससहित पक्राउ परेका थिए । अनुसन्धान अधिकृतलाई सापकोटाले उक्त रकम स्वेच्छाले ल्याएको बताएका थिए । उनलाई सोही दिन पक्राउ गरिएको थियो ।
सापकोटामाथि मेल्लेख गाउँपालिकाका तत्कालीन प्रमुख प्रशासकीय अधिकृतको जिम्मेवारीमा हुँदा मेसिनरी सामान खरिद प्रक्रियामा घुस लिएको आरोप लगाइएको छ । अभियोगपत्रका अनुसार, उजुरीसँग सम्बन्धित कागजात बुझाउन सापकोटा कञ्चनपुरस्थित अख्तियार कार्यालय पुगेका थिए ।
कागजात राखिएको भनिएको हरियो झोलामा रहेको पहेँलो खामभित्र एक लाख रुपैयाँ फेला परेको थियो । अनुसन्धान अधिकृतले रकमको विषयमा प्रश्न गर्दा सापकोटाले “मुद्दा मिलाइदिन तपाईंको लागि स्वेच्छाले ल्याएको हो” भन्ने जवाफ दिएका थिए । अख्तियारले सापकोटाविरुद्ध घुस लिएको ठोस प्रमाणको आधारमा मुद्दा अघि बढाएको जनाएको छ ।
